یکم جنوری سے صوبہ میں مینول رجسٹری پر پابندی عائد کر دی گئی ہے، ای رجسٹریشن نظام لوگوں کیلئے بڑی خدمت ثابت ہوگا، تمام اضلاع میں ای رجسٹریشن سینٹرز قائم کئے جائیں گے جہاں ریونیو سے متعلقہ تمام سروسز ایک چھت تلے فراہم کی جائیں گی۔ زاہد اختر زمان
لاہور (خبر نگار)
چیف سیکرٹری پنجاب زاہد اختر زمان نے ہدایت کی ہے کہ لوگوں کو بہتر سروسزکی فراہمی کیلئے تمام ڈویلپمنٹ اتھارٹیز کا ریکارڈ ایل ڈی اے کی طرز پر ڈیجیٹائز کیا جائے۔
انہوں نے یہ ہدایت گزشتہ روز سول سیکرٹریٹ میں اعلیٰ سطح کے اجلاس کی صدارت کرتے ہوئے کی جس میں میں ای رجسٹری اور اراضی ریکارڈ کی ڈیجیٹائزیشن کے منصوبے PULSEکا جائزہ لیا گیا۔
چیف سیکرٹری نے کہا کہ ریکارڈ کی ڈیجیٹائزیشن کیلئے راولپنڈی،فیصل آباد، ملتان، گوجرانوالہ کی ڈویلپمنٹ اتھارٹیز کو PULSEکیساتھ منسلک کر دیا جائے۔چیف سیکرٹری نے ناروال،لیہ، اوکاڑہ اور پاکپتن کے ڈپٹی کمشنرز کو PULSEمنصوبے پر کام کی رفتار تیز کرنے کا حکم بھی دیا۔
چیف سیکرٹری نے کہا کہ صوبہ میں اراضی کی منتقلی کیلئے ای رجسٹریشن کا نظام متعارف کرایا گیا ہے اور یکم جنوری سے صوبہ بھر میں مینول رجسٹری پر پابندی عائد کر دی گئی ہے۔ انہوں نے کہا کہ ای رجسٹریشن کا نظام لوگوں کیلئے ایک بڑی خدمت ثابت ہوگا، شہریوں کو دفاتر کے چکر لگانے سے نجات ملے گی اورکرپشن کا خاتمہ ہو گا۔
چیف سیکرٹری نے کہا کہ ای رجسٹری کی سہولت کیلئے تمام اضلاع میں ای رجسٹریشن سینٹرز قائم کئے جائیں گے اور ان سینٹرز میں بورڈ آف ریونیو سے متعلقہ تمام سروسز ایک چھت تلے فراہم کی جائیں گی۔انہوں نے کہا کہ ابتدائی طور پر تمام ڈویژنل ہیڈ کوارٹرز میں ای رجسٹریشن سینٹرز قائم کئے جا رہے ہیں۔انہوں نے ڈویژنل کمشنرز کو ہدایت کی کہ لوگوں کی سہولت کو مد نظر رکھتے ہوئے ای رجسٹریشن سینٹرز کیلئے موزوں جگہ کی نشاندہی کی جائے۔
ڈی جی پی ایل آر اے سائرہ عمر نے اجلاس کو تفصیلی بریفنگ دی۔ا نہوں نے بتایا کہ تمام موضع جات کا اراضی ریکارڈ سکین کر لیا گیا ہے،ڈیٹا انٹری کا کام جاری ہے۔سینئر ممبر بورڈ آف ریونیو، سیکرٹری ہاؤسنگ اور متعلقہ حکام نے اجلاس میں شرکت کی جبکہ تمام ڈویژنل کمشنرز اور ڈپٹی کمشنر ز ویڈیو لنک کے ذریعے شریک ہوئے۔
