شو آف ویپن کے ذریعے شہر یوں میں خوف وہراس پھیلانے والوں کو قانون کی گرفت میں لایا جا رہا ہے۔ ڈی آئی جی آپریشنز سید علی ناصر رضوی
لاہور(خبر نگار ، کرائم رپورٹر)
ڈی آئی جی آپریشنز سید علی ناصر رضوی نے کہا کہ لاہور پولیس الیکشن پر امن بنانے کیلئے ناجائز اسلحہ رکھنے والوں کے خلاف زیرو ٹالرنس پالیسی پر عمل پیرا ہے۔شہر کو اسلحہ سے پاک بنانے کی مہم جاری ہے۔شہر یوں میں خوف وہراس پھیلانے والوں کو قانون کی گرفت میں لایا جا رہا ہے۔ڈی آئی جی آپریشنزنے کہا کہ بغیر لائسنس اسلحہ کو ضبط کیا جائے۔ لاہور کے مضافاتی علاقوں میں سرچ آپریشنز تیز کیے جائیں۔اسلحہ دوکانوں کی انسپکشن,بغیر لائسنس اسلحہ کی دوکانوں کے خلاف قانونی کارروائی عمل میں لائی جائے۔تفصیلات کے مطابق لاہور پولیس آپریشنزونگ نے 27دسمبر سے جاری مہم کے دوران اسلحہ ایکٹ کی خلاف ورزی پر723مقدمات درج کئے۔ملزمان کے خلاف کارروائی کرتے ہوئے 754افراد کو حراست میں لیا گیا۔ ملزمان کے قبضہ سے20کلاشنکوف،66رائفلز،24بندوقیں،602 پسٹلز اور06ہزار سے زائدگولیا ں بھی برآمد کی گئیں۔ کارروائی کے دوران کینٹ ڈویژن پولیس نے154،سول لائنز 91،سٹی 166، اقبال ٹاؤن122،صدر 160جبکہ ماڈل ٹاؤن ڈویژن پولیس نے 30مقدمات درج کیے۔سید علی ناصر رضوی نے مزیدکہاکہ لاہور پولیس جرائم پیشہ افراد کے خلاف تادیبی کارروائیاں جاری رکھے گی۔ڈالہ کلچر اور اسلحہ کی نمائش سے شہریوں میں خوف وہراس پھیلانے کی ہر گز اجازت نہیں دی جا سکتی۔شہری اسلحہ کی نمائش اور ہوائی فائرنگ کی اطلاع 15پر پولیس کو دیں تاکہ قانون شکن عناصر کو قانون کی گرفت میں لایا جا سکے۔
