لاہور(خبرنگار ، کرائم رپورٹر)انسپکٹر جنرل پولیس پنجاب ڈاکٹر عثمان انور کی زیر نگرانی پنجاب پولیس صوبے کی سرحدی چوکیوں پر پولیس ٹیمیں ہائی الرٹ ہوکر فرائض ادا کر رہی ہیں اور اسی سلسلے میں پنجاب پولیس ڈیرہ غازی خان کی ٹیم نے بین الصوبائی سرحدی علاقے سے دہشت گردوں کی پنجاب میں داخلے کی کوشش ناکام بنا دی ہے۔ آئی جی پنجاب ڈاکٹر عثمان انور نے جھنگی چیک پوسٹ پر حملہ اور پولیس رسپانس بارے خصوصی ویڈیو پیغام میں بتایا کہ ڈیرہ غازی خان کے تھانہ وہوا کی سرحدی چوکی جھنگی پر کالعدم تنظیم کے 08 سے 10 دہشت گردوں نے رات کی تاریکی کا فائدہ اٹھا کر حملہ کی کوشش کی، چوکی پر تعینات پولیس کے بہادر جوانوں نے جدید ترین تھرمل امیج کیمروں کی مدد سے دہشت گردوں کی نشاندہی کی، پولیس کے جانبازوں نے بروقت کاروائی کی، بھرپور فائرنگ سے دہشت گردوں کو پسپائی اور بھاگنے پر مجبور کر دیا،ایس ایچ او تھانہ وہوا کی قیادت میں پولیس کی دوسری ٹیم بھی بیک اپ کیلئے فوری موقع پر پہنچی، آئی جی پنجاب ڈاکٹر عثمان انور نے کہاکہ صوبے کی تمام سرحدی چوکیوں پر پولیس ٹیمیں شب و روز ہائی الرٹ ہوکر فرائض ادا کر رہی ہیں اورجوانوں کا مورال بلند ہے، آئی جی پنجاب نے کہاکہ شہریوں کی جان و مال کے دشمن خطرناک دہشت گردوں کے خاتمے کیلئے پولیس پوری طرح تیار ہے، ملک دشمن عناصر، دہشت گردوں اور سفاک مجرمان کو کسی صورت صوبہ میں داخل نہیں ہونے دیا جائے گا اوردہشت گردوں کا ہر حملہ ناکام بنایا جائے گا۔
