پی ڈی ایم اے ہنگامی صورتحال میں متاثرہ علاقوں میں ٹینٹ، راشن بیگز کی وافر دستیابی یقینی بنائے۔ زاہد اختر زمان موسم کی صورتحال کی 24گھنٹے مانیٹرنگ کی جا رہی ہے،اضلاع میں موک ایکسرسائز مکمل کر لی گئی ہیں، اجلاس کوبریفنگ
لاہور(خبر نگار)
ممکنہ سیلاب اورمون سون بارشوں کے باعث اربن فلڈنگ کے خطرہ سے نمٹنے کیلئے چیف سیکرٹری پنجاب زاہد اختر زمان نے تمام متعلقہ صوبائی محکموں کو الرٹ رہنے کی ہدایت کر دی۔
انہوں نے یہ ہدایت سول سیکرٹریٹ میں ڈپٹی کمشنرز کے ویڈیو لنک اجلاس کی صدارت کرتے ہوئے کی۔ اجلاس میں ممکنہ سیلاب اور مون سون بارشوں کے باعث اربن فلڈنگ کے خطرہ سے نمٹنے کیلئے تیاریوں کا جائزہ لیا گیا۔
چیف سیکرٹری نے حکم دیا کہ ممکنہ سیلاب سے نمٹنے کیلئے تمام انتظامات مکمل رکھے جائیں اورپی ڈی ایم اے ہنگامی صورتحال میں متاثرہ علاقوں میں ٹینٹ اور راشن بیگز کی وافر دستیابی یقینی بنائے۔ انہوں نے کہا کہ اربن فلڈنگ سے بچنے کیلئے ڈرینز اور سیوریج لائنز کی باقاعدگی سے صفائی کی جائے۔انہوں نے کہا کہ بارشوں کے دوران نشیبی علاقوں سے نکاسی آب کیلئے خصوصی اقدامات کئے جائیں،تمام مشینری اور ڈی واٹرنگ پمپس کو مکمل فعا ل رکھا جائے۔
چیف سیکرٹری نے کہا کہ فلڈ ایمرجنسی پلان پر عملدرآمد ضلعی انتظامیہ کی ذمہ داری ہے۔انہوں نے کہا کہ سیلاب سے متاثرہ علاقوں میں پانی کھڑا ہونے کے باعث وبائی امراض پھیلنے کا خدشہ ہوتا ہے، محکمہ صحت ہسپتالوں اور مراکز صحت میں ادویات، ویکسیئن کی فراہمی یقینی بنائے۔ چیف سیکرٹری نے ڈپٹی کمشنرز کو محکمہ آبپاشی کے افسران کے ہمراہ دریاؤں پر قائم بندوں کے معائنے کرنے سے متعلق ہدایات بھی جاری کیں۔
ڈائریکٹر جنرل پی ڈی یم اے نے اجلاس کو تفصیلی بریفنگ دی۔انہوں نے بتایا کہ موسم کی صورتحال اوردریاؤں میں پانی کے بہاؤ کی 24گھنٹے مانیٹرنگ کی جا رہی ہے۔ انہوں نے کہا کہ تمام اضلاع میں متعلقہ محکموں کے اشتراک سے موک ایکسرسائز مکمل کر لی گئی ہیں اور ضرورت کے مطابق ٹینٹ، کشتیاں، لائف جیکٹس اور ڈی واٹرنگ پمپس مہیا کر دیئے گئے ہیں۔سینئر ممبر بورڈ آف ریونیو، بلدیات، صحت اور متعلقہ محکموں کے سیکرٹریز نے اجلاس میں شرکت کی جبکہ تمام ڈپٹی کمشنرز ویڈیو لنک کے ذریعے شریک ہوئے۔
