چین کی موجودہ طبی، سماجی ترقی،مالیاتی نمو اور پیش رفت کو پاکستان کے ساتھ چائنیز میڈیکل ایسوسی ایشن و پاکستان میڈیکل ایسوسی ایشن” کے ذریعے شیئر کیا جائے گا
لاہور (خبر نگار)چین کی موجودہ طبی، سماجی ترقی،مالیاتی نمو اور پیش رفت کو پاکستان کے ساتھ چائنیز میڈیکل ایسوسی ایشن اور پاکستان میڈیکل ایسوسی ایشن” کے ذریعے شیئر کیا جائے گا۔ یہ بات لاہور میں چینی قونصل جنرل نے اپنے دفتر میں پی ایم اے لاہور کے وفد سے ملاقات میں کہی۔ چینی وفد کی قیادت قونصل جنرل ژاؤ شیرین (Zhao Shiren)نے کی اور اس کی معاونت ڈائریکٹر پولیٹیکل ڈیپارٹمنٹ ڈو یو (Du Yue) نے کی۔ جبکہ پروفیسر ڈاکٹر اشرف نظامی، صدر کی سربراہی میں پروفیسر ڈاکٹر شاہد ملک، جنرل سیکرٹری اور نائب صدر پروفیسر ڈاکٹر خالد محمود خان شامل تھے۔
صدر پی ایم اے نے کونسل جنرل ژاؤ شیرین (Zhao Shiren) کو پی ایم اے لاہور کی اعزازی ممبر شپ پیش کی اور بروچ لگایا۔لاہور میں نومبر 2022 میں منعقدہ تیسری پاک چائنا میڈیکل کانفرنس کا البم اوربیس (20) چینی پروفیسرز سائنسدانوں کی شیلڈز بھی پیش کیں۔ قونصل جنرل کو سابق سفیر جناب سید حسن جاوید کی تحریر کردہ اور اردو میں ڈاکٹر شیر شاہ سید کی ترجمہ کردہ کتاب ”چائنا ماڈل آف ڈویلپمنٹ:پاکستان کیلئے سبق“ بھی پیش کی گئی۔
ملاقات گرمجوشی اور دوستانہ ماحول میں ہوئی۔ تفصیلی گفتگو اور غور و خوض کے بعد محترم جناب ژاؤ شیرین نے مندرجہ ذیل پالیسی فیصلوں سے اتفاق کرتے ہوئے ان کا اعلان کیا:
-1 چینی انتظامیہ کی طرف سے انتظامی امور کے بعد چینی قونصلیٹ لاہور میں ویزا سیکشن کا قیام عمل میں لایا جائے گا۔
پی ایم اے کو لاہور میں ویزہ سیکشن کے قیام تک چین کے دورے کے لیے ویزوں کے اجراء کے لیے چینی قونصلیٹ لاہور میں خصوصی حیثیت دی گئی۔
-2 پاک چائنہ میڈیکل کوریڈور کے تحت مریضوں کے علاج اور پیشہ ور افراد کی استعداد کار بڑھانے کے لیے سائنو پاک میڈیکل ٹورازم کا اجراء کیا جائے گا۔
-3 شنگھائی فورم کے تحت پاکستان میں سماجی، طبی اور ثقافتی شعبے میں سرگرمیوں کو فروغ دیا جائے گا۔
-4 پاک چین دوستی کو مضبوط بنانے اور بیمار انسانیت کی مدد کے لیے چین پاکستان اقتصادی راہداری (CPEC) کے دائرہ کار میں مشاورت اور رسمی کارروائیوں کے بعد لاہور میں ”پاک چائنا ہسپتال” قائم کرے گا۔
اجلاس پروفیسر ڈاکٹر اشرف نظامی کے شکریہ کے ساتھ اختتام پذیر ہوا اور محترم جناب ژاؤ شیرین نے بھی پی ایم اے کے وفد کا شکریہ ادا کیا۔
