آرام دہ صوفے، کرسیاں، صاف ستھرا ماحول، یونیفارم میں ملبوس عملہ، 7 ماہ میں 3 منزلہ نیا تھانہ تعمیر، وزیر اعلی محسن نقوی نے تھانہ ہنجر وال کی نئی عمارت کا افتتاح کر دیا

سائلین کیلئے ٹوکن سسٹم لگانے کی تعریف، دروازوں کی کوالٹی بہتر بنانے کی ہدایت کی، حوالات میں بند ملزمان سے ان کے کیسز کے بارے پوچھا. وزیر اعلی نے سائلین کیلئے بہترین سہولتوں کی فراہمی کے اقدام کو سراہا،انسپکٹر جنرل پولیس،سی سی پی اولاہور،ڈی آئی جی آپریشنز اور ان ٹیم کو مبارکباد دی پنجاب بھر میں 737 تھانوں کی اپ گریڈیشن کا کام جا ری، ہر تھانہ اپ گریڈہوگا، کسی تھانے کو نظر انداز نہیں کیا جائے گا:محسن نقوی

لاہور(خبر نگار)آرام دہ صوفے و کرسیاں، صاف ستھرا ماحول، یونیفارم میں ملبوس فرنٹ ڈیسک کاعملہ، 7 ماہ میں 3 منزلہ نیا تھانہ تعمیر۔ وزیر اعلی محسن نقوی نے رات گئے تھانہ ہنجر وال کی نئی عمارت کا افتتاح کر دیا۔وزیر اعلی محسن نقوی نے تھانہ ہنجروال کے مختلف شعبوں کا معائنہ کیااور فرنٹ ڈیسک کا جائزہ لیا۔وزیر اعلی محسن نقوی نے ٹوکن مشین سے ٹوکن لیا اور سائلین کے لئے ٹوکن سسٹم لگانے کی تعریف کی۔وزیر اعلی محسن نقوی نے ویٹنگ،ایس ایچ او روم، آئی ٹی روم اور میٹنگ روم کا معائنہ کیا۔وزیر اعلی محسن نقوی نے دروازوں کی کوالٹی بہتر بنانے کی ہدایت کی۔وزیر اعلی محسن نقوی نے حوالات میں بند ملزمان سے ان کے کیسز کے بارے پوچھا۔وزیر اعلی محسن نقوی نے سائلین کے لئے بہترین سہولتوں کی فراہمی کے اقدام کو سراہا۔ وزیر اعلی محسن نقوی نے انسپکٹر جنرل پولیس،سی سی پی اولاہور،ڈی آئی جی آپریشنز اور ان ٹیم کو مبارکباد دی۔انسپکٹر جنرل پولیس ڈاکٹر عثمان انور نے تھانہ ہنجروال کی تعمیر اور سائلین کے لیے فراہم کردہ سہولتوں کے بارے میں بریفنگ دی۔وزیراعلیٰ پنجاب محسن نقوی نے تھانہ ہنجرال کی نئی عمارت کے افتتاح کے بعد میڈیاسے گفتگو کرتے ہوئے کہا کہ پنجاب بھر میں 737 تھانوں کی اپ گریڈیشن کا کام جا ری ہے۔صوبے کے ہر تھانے کی اپ گریڈیشن ہوگی اور کسی بھی تھانے کو نظر انداز نہیں کیا جائے گا۔ہر تھانے میں فرنٹ ڈیسک، ایس ایچ او روم، انویسٹی گیشن او رویٹنگ روم کو بہتر کیا جارہاہے۔لاہور میں 22نئے تھانے بنائے جا رہے ہیں۔محکمہ تعمیرات ومواصلات پر کام کا کافی دباؤ ہے۔امید ہے کہ لاہور کے 22نئے تھانے جلد تعمیرہوں گے۔ایڈیشنل چیف سیکرٹری داخلہ کی سربراہی میں کمیٹی قائم ہے،جو 16 اضلاع میں سیف سٹی پراجیکٹس کو مزید توسیع دے گی۔ماضی میں بڑے ایونٹس کے لئے کیمروں کی مد میں ایک ارب روپے کرایہ دیا جاتاتھا لیکن اب کیمرے لگنے سے اس رقم کی بچت ہوگی۔تھانوں کی حالت بھی بہتر ہورہی ہے اور تھانہ کلچر بھی تبدیل ہورہاہے۔نوجوان اورایماندار پولیس آفیسرکو تعینات کیا جارہاہے جس کے مثبت اثرات سامنے آئے ہیں۔لاہور میں ایک روز میں 24ہزار 8سوڈرائیونگ لائسنس بنے ہیں جو آج سے ایک ماہ قبل صرف250یومیہ تھے، یہ ایک ریکارڈ ہے۔جب کریک ڈاؤن نہیں شروع ہوا تھا تو روزانہ کی بنیاد صرف اڑھائی سو لائسنس بنتے تھے جبکہ پنجاب بھر میں ایک روز میں 75ہزار لائسنس بنائے گئے ہیں۔ایڈیشنل چیف سیکرٹری داخلہ سیف سٹی پراجیکٹس پر دن رات محنت کررہے ہیں۔پولیس کے حوالے سے اچھا فیڈ بیک مل رہاہے پولیس کے تاثر میں بہتری آئی ہے۔سائلین تھانے کے حوالے سے کیو آر کوڈ پر اپنا فیڈ بیک دے سکتے ہیں۔صرف لاہور میں ہی نہیں پنجاب کے 737تھانے اپ گریڈ کررہے ہیں۔انشاء اللہ ری ویمپنگ، اپ گریڈیشن اور دیگر پراجیکٹس وقت میں مکمل کرلیں گے،جو بھی وزیراعلیٰ آئے گا انشاء اللہ بہتر کام کرے گا۔9ہزار کے قریب پولیس کی مزید بھرتی کی جارہی ہے۔کچے کے علاقے میں پوری ٹیم کے ساتھ وزٹ کیا ہے، ڈاکوؤں کے گینگ کا خاتمہ کریں گے۔کچے کے علاقے کی ترقی کے لئے علیحدہ پیکیج ترتیب دیاہے،جس میں 19پولیس سٹیشن،2 بیسڈ سٹیشن، سکول، روڈز او رہسپتال شامل ہیں۔ایک سوال کے جواب میں انہوں نے کہاکہ والدین سوچ لیں کہ بچوں کو تھانے میں رکھناہے یا ان کا لائسنس بنوانا ہے۔ والدین اپنے بچوں کا لائسنس ضرور بنوائیں، کوئی نرم نہیں کی جائے گی۔لاہورمیں 70لاکھ گاڑیاں و موٹر سائیکلیں ہیں اور صرف 10لاکھ لا ئسنس۔طلبہ کے لئے میٹروبس اور اورنج لائن میٹرو ٹرین پر سفر مفت کردیا ہے۔صوبائی وزراء عامر میر، اظفر علی ناصر، انسپکٹر جنرل پولیس ڈاکٹر عثمان انور،ایڈیشنل چیف سیکرٹری داخلہ میاں شکیل احمد،سی سی پی او لاہور بلال کمیانہ سیکرٹری تعمیرات و مواصلات،ڈی آئی جی آپریشنز، ڈپٹی کمشنر،سی ٹی او اور دیگر حکام بھی اس موقع پر موجود تھے۔