بے روزگاری 40 سال کی ریکارڈ سطح پر، نوجوانوں کو نجی شعبے میں نوکریاں دینگے:عبدالعلیم خان

ریاست وسیاست عدم برداشت،نفرت،گالی وگولی کی متحمل نہیں ہو سکتی،کشمیریوں سے یکجہتی. مسائل کا حل اولین ترجیح، شاہدرہ کی ترقی کیلئے ماسٹر پلان اور لانگ ٹرم پالیسیاں لائیں گے 

لاہور(خبر نگار)استحکام پاکستان پارٹی کے صدر اور قومی و صوبائی اسمبلیوں کے لئے امیدوار عبدالعلیم خان نے کہا ہے کہ ملک میں بے روزگاری کا چالیس سال کا ریکارڈ ٹوٹ گیا، یہ لعنت نوجوانوں کی آنکھوں میں سجے سنہری خوابوں اور صلاحیتوں کو دیمک کی طرح چاٹ رہی ہے،آئی ایم ایف کی تازہ رپورٹ بھی پاکستان میں بے روزگاری کی ساڑھے 8فیصد شرح پر چیخ اٹھی ہے۔عبدالعلیم خان نے کہا کہ با شعور عوام 8فروری کو درست فیصلہ کریں، انشاء اللہ ہم اقتدار میں آکر با صلاحیت یوتھ کو نجی اور سرکاری شعبوں میں ایک کروڑ سے زائد نوکریاں دیں گے اور پہلے دن سے ہی مہنگائی، بے روزگاری اور غربت کے خاتمے کے عملی ایجنڈے پر کام شروع کریں گے۔این اے 117میں بادامی باغ اور شاہدرہ کے علاقوں میں انتخابی جلسوں سے خطاب کرتے ہوئے عبدالعلیم خان کا کہنا تھا کہ ہماری ریاست اور سیاست عدم برداشت،نفرت،گالی اور گولی کی متحمل نہیں ہو سکتی،ہمیں سیاسی وابستگیوں سے بالاتر ہو کر باہمی احترام اور قومی اتحاد و یکجہتی کو رواج دینا ہوگااس لیے ماضی میں ہونے والے بد انتظامی اور انتقامی سیاست کے واقعات دہرانے کی اجازت نہیں دیں گے تاکہ ملک میں سیاسی کلچر تبدیل ہو سکے۔عبدالعلیم خان نے 5فروری یوم کشمیر کے حوالے سے کشمیریوں سے یکجہتی کا اظہار کرتے ہوئے کہا کہ پاکستان کا بچہ بچہ اپنے بھائیوں کے ساتھ ہے اور دعا گو ہے کہ انہیں جلد آزادی کا سورج دیکھنا نصیب ہو۔عبدالعلیم خان نے کہا کہ 75برسوں سے زیر التوا کشمیر کا مسئلہ عالمی اداروں کیلئے بھی کسی چیلنج سے کم نہیں جو بھارت کی مکارانہ اور غاصبانہ سوچ کا عکاس ہے۔
عبدالعلیم خان نے این اے117کے حوالے سے خطاب میں کہا کہ شاہدرہ کے مسائل کے حل کے لئے ماسٹر پلان لائیں گے اور ایسی ترجیحات کا تعین ہوگا کہ لانگ ٹرم پالیسیوں کے ذریعے تعلیم، صحت اور دیگر شعبوں میں وہ تبدیلیاں لائی جا سکیں جو این اے117کے عوام کی ضرورت ہیں۔ انہوں نے کہا کہ انتخابی مہم کے دوران انہیں پی پی145اور پی پی146کے دونوں صوبائی حلقوں سے جو پذیرائی ملی ہے اُس پر وہ عوام کے مشکور ہیں اور توقع کرتے ہیں کہ 8فروری کو قومی اسمبلی کی نشست پر عقاب اور صوبائی سیٹوں کے لئے شیر کے امیدوار کامیاب ہوں گے۔ عبدالعلیم خان نے این اے117میں کالا خطائی روڈ،جمیل پارک میں شاہد نذیر جٹ اور شاہ جہاں پارک فلور مل ایریا میں شاہ جہاں گیلانی کی طرف سے منعقدہ جلسوں سے خطاب کیا جبکہ وہ مزمل بھٹی کی دعوت پر فیصل پارک مین بازار سعید خان کی طرف سے بادامی باغ میں منعقدہ جلسے سے خطاب کیا جہاں اُن کا پرتپاک استقبال کیا گیا اور شہریوں نے "ہماری یہ مجبوری ہے۔۔علیم خان ضروری ہے”کے فلک شگاف نعرے لگائے، پھولوں کی پتیاں نچھاور کی گئیں اور جگہ جگہ نوجوانوں کی ٹولیوں نے رقص کرتے ہوئے عبدالعلیم خان کو ہار پہنائے۔سابق صوبائی وزیر میاں خالد محمود کے علاوہ پی پی145سے امیدوار صوبائی اسمبلی سمیع اللہ خان اور پی پی146سے امیدوار غزالی سلیم بٹ نے بھی جلسوں سے خطاب کیا جبکہ عبدالعلیم خان کی انتخابی مہم کے انچارج میاں جنید ذو الفقار اور ملک زمان نصیب بھی اس موقع پر موجود تھے۔عبدالعلیم خان نے بیگم کوٹ میں ملک احمد حسن کی رہائشگاہ پر عشائیے میں بھی شرکت کی۔