مزار بی بی پاکدامن کیلئے ایمپرس روڈ سے نئے راستے کی تعمیر کاکام تیز، تمام پختہ سٹرکچر ہٹا دیئے گئے،وزیراعلیٰ محسن نقوی کا رات گئے مزار بی بی پاکدامن کا دورہ

نئے راستے کیلئے زیر تعمیر سڑک پر پیش رفت کا جائزہ لیا، سڑک کی تعمیر کے ساتھ گاڑیوں کی پارکنگ کیلئے مخصوص جگہ کا کام جلد مکمل کرنے کی ہدایت
لاہور(خبرنگار)وزیر اعلیٰ پنجاب محسن نقوی کی ہدایت پر مزار بی بی پاکدامن کیلئے ایمپرس روڈ سے نئے راستے کی تعمیر کاکام تیز اورنئے راستے کی تعمیر میں حائل تمام پختہ سٹرکچر ہٹا دیئے گئے۔ وزیراعلیٰ پنجاب محسن نقوی نے رات گئے مزار بی بی پاکدامن کا دورہ کیا اور نئے راستے کیلئے زیر تعمیر سڑک پر پیش رفت کا جائزہ لیا۔ وزیراعلی محسن نقوی نے نئی سڑک کی تعمیر کے ساتھ گاڑیوں کی پارکنگ کیلئے مخصوص جگہ کا کام جلد مکمل کرنے کی ہدایت کی۔ وزیراعلیٰ محسن نقوی نے سڑک کی تعمیر کے حوالے سے اے سی شالامار انعم فاطمہ اوران کی ٹیم کی کارکردگی کو سراہا۔ وزیر اعلیٰ محسن نقوی نے متعلقہ پولیس اہلکاروں سے مصافحہ کیا اورانہیں شاباش دی۔ وزیراعلیٰ محسن نقوی نے مزار بی بی پاکدامن پر دئیے جلانے کیلئے علیحدہ جگہ مختص کرنے کی ہدایت کی اور کہا کہ ایمپرس روڈ تک 20فٹ چوڑی سڑک کی تعمیر سے زائرین کو مزار تک آسان رسائی حاصل ہو گی۔وزیراعلیٰ محسن نقوی نے مزار پر حاضری دی اورملک کی سالمیت،استحکام،امن، قوم کی خوشحالی اورترقی کیلئے دعا کی۔ صوبائی وزراء اظفر علی ناصر،منصور قادر، سیکرٹری تعمیرات ومواصلات،کمشنر لاہور،سیکرٹری اوقاف، سی سی پی او،ڈپٹی کمشنر اورمتعلقہ حکام بھی اس موقع پر موجو دتھے۔